бүркеніш жабдықтары

(Маскировочные средства)

әскери объектілерді бүркемелеуге пайдаланылатын мүліктер, техникалар, оқ-дәрілер, табельдік және әскерлер дайындаған өнімдер. Атқаратын қызметіне қарай оптикалық бүркеніш жабдықтарына, радиолокациялық бүркенішке, дыбыстық бүркеніштерге, жылу бүркеніштеріне, түтіндету құралдарына, гидроакустикалық бүркенішке, пиротехникалық құрамға, бүркеніштік сырлау құралдарына бөлінеді. Оптикалық бүркеніш жабдықтарына: бүркеніш киімдер, жинақтар мен бүркеме, макеттер мен олардың толық жинағы кіреді. Бүркеніш киімдерді комбинизондарды, костюмдерді, жамылғыларды, халаттарды барлаушылар, мергендер, саперлер, байланысшылар (қарсыласқа жақын әрекет етушілер) киеді. Жаздық бүркеніш киім, әдетте, түрлі-түсті, шұбар, ал қыстық бүркеніш ақ болады. Б.ж. мен бүркеме (табельдік) әскери техниканы, автокөлікті, окоптарды, тасаларды жасыру үшін пайдаланылады. Макеттер жалған объектілерді салғанда қару-жарақты, әскери техниканы, құрылыстарды, жергілікті заттарды елестету үшін пайдаланылады. Радиолокациялық бүркеніш құралдары — радиолокациялық көрсеткіштер, радиотарату және радиожұту жапқыштары болып табылады. Жарық бүркеніш құралдары – фарға арналған жарық бүркеніш құрылғылары, автокөлік және сауытты танк техникасының үлкен көлемді және сигналдық оттарының құрылғылары, жарық түсіргіш жинақтар, жалпы және жергілікті жерге жарық түсіруге арналған бүркемелік бастырмалары бар шырақтар мен фонарьлар. Жылу бүркеніш құралдары — қыздырылған беттердің температурасын төмен түсіретін қондырғылар, кеңейту камералары және т.б. Дыбыстық бүркеніштер — әскерлердің жылжуы мен инженерлік жұмыстарының дыбыстық бүркеніш белгілерін жасыруға арналған дыбыстық хабарлау қондырғылары.